Lín a níiɗ daa légéyë ɓëy Ndút lukuu hégíƴëh në rë.
Lín a gup
Soñaan
Lín a mësín
Lec too
Sak kimaate
Kíilë, ɓëy Ndút húmú línúu a gup. Línëꞌí wë a gup nék kaaꞌeeh wa na húmú lecu yii mín wëe kúɗ kíilë ɓéeɓ ndah muluɓ húmú caakke, te wahambaane na húmú taseh luuf bee Koo waaƴe yeen ɗa. Wa húmú lukuu lín too súunë, pím (bësí a saangírëen), Yalaa, ñéembí, kimaate a waŋ.
Jamanee woteh bee nék, wa línúu a mësín, te wa na líníh yii ñamun wa. Wa hoñci línúu kimaatii yayun wa, nda wa líjëntëꞌ sohle yi wa. Hen ɗaa mumuɓ caakay líjë rëe nék, wa yíppí jeeŋ.
Níiɗ
Bi ɓëy Ndút húmú paƴuu sohle yi wa a júr, tahte wa míníh ñakki pëkíh júr.
Sérlí Ndút húmú kaañce gaan yup kíilë kat ! Júrë në húmúu hoñuu waa pok ɗa nék fana daa húmú luk naa lah soloh, ndah fana non iña na pok mboko mi séréel rë. Yee tah ra daa ri biti : wuti ɓëeꞌ húlëe Loofe raa, fan fa nay looyuu luuya ra mín kolaa Ñeheɓ, teeɓaꞌi biti ɓëeꞌ húl baa ra non yuba kolaꞌ fan fa ra di ɓíiɓ. Te tígí kelaa fu fana yaayute, ɗeef mboko daa ɗéɓpí took goneelte.
Bee ke yup peꞌ bee nék, ow yínë rek mín ɗíi lahaꞌ, ndah peꞌ saamu paƴaa sohle ya caŋ ra, te ow mín lah haneel ɗee leegi fu pëkís fu hap te ñeyeh goneel.
Hëndíɗ fana
